Рөстәм Хәсәнов Ришат Төхвәтуллинга өч литр нәрсә бүләк иткән?
Җырчы бүләкне сүтеп бетергәнче, инстачылар төргәк эчендә нәрсә булуын беләселәре килеп аптырап беткән.
Ришат Төхвәтуллинның концертыннан соң якташы, «Мунча ташы» юмор театры арститы Рөстәм Хәсәнов җырчыга үзенчәлекле бүләк тапшыра.
Матурлап зәңгәр кәгазь белән төрелгән бүләкне: «Синнән булгач, берәр кызык әйбердер инде», — дип Ришат бик ашыйкмыйча гына сүтә.
«Минем бүләкнең кыйбатлы, затлы әйбер булуы мөмкин түгел», — ди Рөстәм, артист халкының хезмәт хакы аз булуга ишарәләп.
Видеоны карап бетергәнче үк инстачылар төргәктә нәрсә икәнен белергә тырышканнар. Банкалы әйбер икәнлеге күренеп торгач: «Өч литр авыл каймагы», «Авыл сөте алып килгәнме әллә?», «Май», «Бал», «Мәхмүр абыйсыннан яшереп өч литр сәмәй алып килгәнме әллә?» — дигән вариантлар язганнар.
Ә төргәк эченнән өч литр машина тәрәзәсен чистарта торган сыеклык килеп чыга. Ришат та, Рөстәм дә шаян бүләктән рәхәтләнеп көләләр.
«Сезон бит хәзер», «Иң кирәкле әйбер юлда йөргән кешегә», — дип язалар инстачылар.
Шулай ук Башкортстандагы блогер Рөстәм Нәбиевнең хатыны Индира Рөстәм Хәсәнов турында: «Яраткан абыем», — дип комментарий калдырган. «Абыегыз икәнлеген белмәгән идек. ‚Мунча ташы“ның иң кызык артисты, ул уйнаган рольләрне бик яратам», — дип язган аңа бер инстачы.