Мунча себеркесен чабыныр алдыннан пакетка салып пешерү сере

Мунча себеркесен табакка кайнар суга салып пешергәндә бөтен файдасы суга чыгып бетә икән.

Мунча себеркесен целлофан пакетка салып пешереп була. Бу турыда «Челнинские известия» сайты хәбәр итте.

Чабына торган себерке сыгылмалы булсын, файдалы үзлекләрен кешегә бирсен, ә яфраклары таралып бетмәсен өчен, аны целлофан пакетка төреп куярга кирәк. Себеркене кайнар сулы табакка салмагыз, аның бөтен файдасы кайнар суга чыгып бетәр, диелә бу хәбәрдә.

Себеркене целлофан пакетка салып җебетү ысулын оста мунчачылар бик ярата. Аны башта җылымса суда 10-15 минут җебетеп алыгыз һәм пакетка төреп куегыз. Бу эшне иртәнге якта эшләргә кирәк. Көн буе пакетта торган себерке белән кичке мунчага барып булачак. Мунчага кергәч, себеркене җылы суда чайкап алыгыз, аны кап-кайнар суга тыгыгыз, суын селкеп төшерегез һәм мунча ташы янында кыздырып алыгыз. Бу турыда киңәшләр сайтында язылган.

Яңа себеркене караңгы һәм җилләтелә торган урында киптерегез. Аннары катыргы тартмаларда саклагыз. 

Кыш көне мунчага керер алдыннан, себеркене карга күмеп торыгыз, аннары мунча ташы янында селкеп алыгыз. Бу очракта себерке яфраклары ачылып китәр.