Йомырка ашаудан бөтенләй баш тартсаң ни була?
Йомырканы күп итеп ашау атеросклероз авыруы барлыкка килү куркынычын арттыра.
Кеше бөтенләй йомырка ашаудан баш тартса, организмга фолий кислотасы, фосфор, селен, кальций һәм цинк керми башлый. Әлеге матдәләр булсын өчен сөт ризыклары, яшелчәләр, җиләк-җимешләр һәм кузаклыларны ашарга кирәк. Бу турыда «Лента.ру» яза.
Белгечләр сүзләренчә, кеше йомырка ашаудан баш тартса, ачлык хисе ешрак була. Чөнки йомырка аксымга бай, аксым кешегә озак вакытка туену хисе бирә.
Йомырка ашамаучыларга ябыгу да кыен була. Йомырка ашамаган очракта, тофу яки соя ашарга кирәк.
Йомырканың тискәре йогынтысы да бар. Аны артык ашау канда холестерин күләмен арттыра, икенче типтагы шикәр авыруы барлыкка килә. Бер зур йомыркада 186 миллиграмм холестерин бар, ул тәүлеклек норманың 62 процентын тәшкил итә.
Көненә өч һәм аннан да күбрәк йомырка ашаучы кешеләрнең «яхшы» холестерины күләме арта. Йомырка ашау атеросклероз барлыкка килү куркынычын арттыра, диелә хәбәрдә.