Тәмәке тарта торган күршеләрне ничек җиңеп була? | intertat.tatar

Тәмәке тарта торган күршеләрне ничек җиңеп була?

Полициядә гаризаны бар кагыйдәләргә туры китереп кабул итүләрен тикшерегез.

Йорт подъездында баскычка чыгып тәмәке тартучылар белән көрәшнең берничә ысулы бар. «Челнинские известия» шул хакта язды.

Башта тыныч кына сөйләшеп карагыз. Бәлки алар комачаулауларын белми торгандыр. Әгәр мәсьәләне тыныч кына хәл итеп булмаса, башка ысулларга күчәргә була.

Юристлар сүзләренчә, җәмәгать урыннарында тәмәке тарту тыелу турында кагыйдәләрдә түбәндәге урыннар бар: лифт, подъезд, йортта яшәүчеләрнең башка уртак милеге, шул исәптән коммуналь фатирда да. Бу урыннарда тәмәке тарткан өчен 500-1500 сум штраф каралган.

Шулай да бу кагыйдәне күп тапкыр бозган очракны да исбатлау катлаулы. Полиция нидер эшләсен өчен, язмача мөрәҗәгать итәргә кирәк. Мөрәҗәгатьтә фото яки видеоматериаллар булырга тиеш. Полициядә гаризаны бар кагыйдәләргә туры китереп кабул итүләрен тикшерегез. Аңа керү номеры бирелергә тиеш. Тикшерү барышында участок полиция хезмәткәре күршеләрне яки башка шаһитларны сораштыра ала.

Баскычта яки балконда тәмәке тартучылар белән күршеләр арасындагы низаглар еш тикшерелә. Берничә ел элек суд төтеннән интегүче күршеләргә мораль зыян өчен тәмәке тартучыдан компенсация түләттерде. Суд аңлатканча, һәркем кайда тәмәке тартасын үзе хәл итә, ләкин төтен башка күршеләргә комачауламаска тиеш, диелә хәбәрдә.