Кибеттә нинди арзанлы һәм файдалы ризыклар алып була?
Бу ризыклар теләсә кайсы кибеттә сатыла.
Файдалы ризык кыйммәтле булырга тиеш дигән сүз түгел әле. «Сәламәт туклану» фәнни-тикшеренү үзәгенең башкарма директоры Зинаида Медведева шулай дип саный. Бу турыда Медикфорумга сылтама белән «Челнинские известия» хәбәр итте.
Мәсәлән, тавык йомыркасы файдалы һәм арзанлы ризыкларның берсе булып тора. Йомыркада аминокислоталар җыелмасы бар, даими рәвештә атнасына өч-биш йомырка ашаган очракта, инсульт ихтималы кими, дип сөйли эксперт.
Арзанлы һәм файдалы ризыкларның тагын берсе — карабодай. Анда мөһим микроэлементлар, органик кислоталар, кальций һәм фосфор бар. Карабодай ашау йөрәк-кан тамырлары системасына яхшы йогынты ясый.
Кузаклыларны — фасоль, ясмык, борчакны коры килеш алып, үзең пешереп ашау хәерле. Аксым күп булу сәбәпле, алар туену хисен озак сакларга ярдәм итә, кеше артыгын ашамый. Шулай ук алар канда шикәр микъдарын яхшырта, аның тирбәлешен булдырмый.
Кәбестәдә 16 төрле аминокислота бар, кишер А витаминына һәм клетчаткага бай, суганда фруктаннар була.