Эшләүче пенсионерларга быел индексация ясыйлармы?

Ел саен 1 августта Пенсия фонды пенсияләрне кабат исәпли.

Быел эшләүче пенсионерларның пенсияләрен арттыру турында «Челнинские известия» сайты Пенсия фондының Чаллы буенча идарәсе җитәкчесе Эдуард Фатыйховтан белешкән.

Ирина исемле укучы 2019 һәм 2020 еллар өчен пенсияләрне индексацияләү турында сорау биргән булган.

Эдуард Фатыйхов сүзләренчә, ел саен 1 августта Пенсия фонды эшли торган пенсионерларның пенсиясенең иминият өлешен кабат исәпли. Моның өчен гариза язарга кирәкми. 2019 елда эшләгән пенсионерларның пенсиясен быел исәплиләр. Мондый исәп-хисап былтыр иминият взнослары керткән кешеләрнең пенсиясенең иминият өлешенә кагыла. Яңадан исәпләгәннән соң пенсияне арттыру күләме пенсия коэффициентлары белән чикләнә, диелә бу хәбәрдә.