Эпидемия вакытында идәнне көненә ничә тапкыр юарга?

Роспотребнадзор өй җыештыру өчен киңәшләр чыгарды. Бу турыда ведомство сайтында язылган.

Өй яки фатир идәннәрен чылатып юарга кирәк. Гаиләдәгеләр барысы да сәламәт булса, идәнне атнасына ике-өч тапкыр, көнкүреш химиясе кулланып юарга кирәк. Өйдә берәр кеше авырый башласа, идәнне көн саен чылатып юу һәм хлорлы антисептик куллану хәерле.

Өйдәге кешеләр еш орына торган ишек тоткалары, ут сүндергечләр, шкаф тоткалары, көнкүреш приборлары һәм башкалар спиртлы эремә яки хлорлы катнашма белән сөртелергә тиеш. Мондый эремәдә спирт күләме 70 проценттан ким булмасын. Бу әйберләрне сабынлы су белән юсаң да ярый.

Урамнан керә торган ишек тоткасын сөртү кагыйдәсе аерым: урам ишеге тоткасын өйгә керүгә үк сөртергә кирәк. Кулны сабын белән югач түгел, нәкъ менә өйгә керүгә үк ишек тоткасын дезинфекцияләргә кирәк, ди белгечләр.

Өйдә тотыла торган башка предметларга килгәндә, аларны көненә бер тапкыр дезинфекцияләргә кирәк. Бу фатирдагы кешеләр барысы да сәламәт булган очракта. Әгәр өйдә берәр кеше авырып ятса, әйберне тоткан саен дезинфекцияләү хәерле.

Су краннарын һәм раковиналарны чистартканда көнкүреш химиясе кайнар су белән тулысынча чистартылып беткәнеме икәнен тикшерегез. Ванна бүлмәсен чистарту өчен хлорлы дезинфекция чаралары кулланыгыз.