Свердловск өлкәсенең Артинский районындагы Березовка авылында берьюлы 10 өй янып беткән. Янгын пыяла банка аркасында килеп чыккан, дип яза «Комсомольская правда».
Фаҗига 28 майда була. Бәхеткә, кешеләргә зыян килмәгән. Полиция белешмәсе буенча, янгын буш пыяла банка аркасында чыгуы ихтимал.
«Гадәттән тыш хәл Грязнов урамындагы участокларның берсендә пыяла банка аркасында башлануы ихтимал. Мөгаен, ул линза эффекты китереп чыгарган һәм кояш нурлары аша коры чирәмгә ут капкан булуы мөмкин», – дип сөйләгәннәр Эчке эшләр министрлыгының Свердловск өлкәсе буенча идарәсе матбугат хезмәте җитәкчесе Валерий Горелых.
Ялкын күрше мунчага күчә, аннары торак йортларга. Авыл халкы сүзләренчә, бу вакытта авылда бик көчле җил була, ут бөтен авылга тарала.
Полициядә исә фаҗига сәбәпләренең башка версияләре дә булуын әйтәләр.
«Килгән зыянның гомуми суммасы 12 млн сум чамасы. Төгәл сумманы махсус комиссия билгели. Йортсыз калган кешеләр туганнарына урнашып тора», – дигәннәр.
Зыян күрүче гаиләләрнең берсенә Арти бистәсендә торак бирәләр. Ул Березовкадан 45 км ераклыкта. Башка зыян күрүчеләргә компенсация түләргә мөмкиннәр, диелә хәбәрдә.