Россия – дөньядагы иң яхшы ил, әмма әле эшлисе эшләр бар, ә нәтиҗәләргә ирешер өчен илгә югары квалификацияле кадрлар кирәк, диде Россия Президенты Владимир Путин Стратегик инициативалар агентлыгы утырышында. Бу хакта РИА Новости яза.
«Һөнәри осталыкны үстерү агентлыгы» генераль директоры Роберт Уразаев доклады вакытында, Путин аның чыгыш ясаганда җибәргән хатасына игътибар итте һәм төзәтте.
«Бер нәрсәгә игътибар иттем. Хәзер сез сөйләгәндә, «башка илләрдә, дөньядагы яхшы илләрдә...» дидегез дә алга таба текст буенча сөйләп киттегез. Дөньядагы иң яхшы ил ул – Россия. Сез ялгышып кына әйткәнсездер, дип өметләнәм. Әмма, дөрес, әле эшлисе эшләр бар. Ә нәтиҗәле эшләү өчен безгә, һичшиксез, иң югары квалификацияле кадрлар кирәк», – диде Владимир Путин.
Бүген Россия Президенты Стратегик инициативалар агентлыгының күзәтчелек советы утырышын уздырды. Анда катнашучылар агентлыкның узган елгы эшенә йомгак ясады һәм 2023 елга планнар корды.