Россия Президенты Владимир Путин махсус хәрби операциядә катнашучы хәрбиләрнең әниләре белән очрашу вакытында өлешчә мобилизация турында телгә алды.
Әлеге очрашу вакытында Краснодар шәһәреннән Ирина Сумынина үзенең 4 улы булуын, шуларның 2се һәм иренең махсус хәрби операциядә катнашуын әйтте. «Хәзер иң кече улыма тиздән 18 яшь тула. Һәм ул да махсус хәрби операциягә китәр дип куркам», – диде ул Россия Президентына.
«Юк-юк, кирәк түгел, безгә җитә», – дип җавап бирде Путин.
Кайбер мәгълүмат чаралары, шушы чыгыштан нәтиҗә ясап, «Путин өлешчә мобилизация төгәлләнүе турында әйтте» дигән хәбәр таратты.
Кремль пулындагы журналистлар хәбәр итүенчә, Путин өлешчә мобилизация турында түгел, конкрет шушы очрак турында сөйли. Ул ананың хәрби операциядәге тагын бер улын кире кайтырга кирәклеген генә күздә тоткан.