Путин, массакүләм дрон һөҗүме булганда, атом бомбасы кулланылылуы ихтимал икәнен әйтте

Бүген Россия президенты Владимир Путин атом-төш коралына каршы тору буенча Иминлек Советы утырышы уздырды. Ул беренче тапкыр ачык тәртиптә узды.

Путин әйткән төп фикерләр:

• Россиянең атом-төш доктринасында атом коралын куллану ихтимал булган илләр категориясе киңәйтелгән.
• Атом-төш коралы булмаган ил, Россиягә һөҗүм ясаса, бу илгә атом-төш коралы булган ил ярдәм итсә, бу Россиягә һөҗүм дип бәяләнәчәк.
• Белоруссиягә каршы һөҗүм булганда, Россия атом-төш коралы куллана ала.
• Россия тарафына күпләп авиация һәм космос чаралары һөҗүм ясаган дигән мәгълүмат булганда, Россия атом-төш коралы куллана ала. Бу һөҗүмгә тактик, стратегик авиация, канатлы ракеталар, дроннар, башка төрле очкычлар керә.
• Гадәти корал белән дә Россиянең бәйсезлегенә янарлык һөҗүм булса, атом-төш коралы кулланылырга мөмкин.
• Атом-төш коралы Россиянең бәйсезлеген саклаучы гарантия булып тора.
• Россия атом-төш коралының дөньяда таралмавын тели.