Россия Президенты Владимир Путин өлешчә мобилизациягә эләккән, әмма әле махсус хәрби операция зонасына җибәрелмәгән россиялеләрнең күпме булуын әйтте. Бу хакта «Комсомольская правда» газетасы яза.
«Кораллы Көчләр сафына 300 мең кеше чакырылды. Аларның бер өлеше инде хәрби хәрәкәтләр зонасында, 150 мең кеше – полигоннарда. Бу – операцияне алып бару өчен җитәрлек резерв», – диде ул Оборона министрлыгы коллегиясе утырышында.
Шулай ук дәүләт башлыгы өлешчә мобилизация уздыру кайбер проблемаларны ачыкларга ярдәм иткәнен дә әйтте. Беренче чиратта, комиссариатлар системасын модернизацияләргә кирәк, диде ул.
Моңа кадәр Путин махсус операциядә катнашучы һәм хәзерге вакытта алгы сафта булган хәрбиләргә рәхмәт әйтте һәм махсус операциядә ватан өчен гомерләрен биргәннәрне бер минутлык тынлык белән искә алды. Шулай ук ул, безнең солдатлар батырларча көрәшә һәм куелган бурычларны хәл итә, дип әйтте.