Президент Владимир Путин телефон һәм интернет-мошенниклыкка каршы тору турындагы законга кул куйды, документ хокукый актларны рәсми бастырып чыгару порталында урнаштырылган.
Дәүләт Думасы законны 1 атна элек кабул итте, 2 көннән соң, аны Федерация Советы хуплады.
Ә сезнең мошенниклар тозагына эләккәнегез бармы, һәм «Интертат» укучылары арасында андыйлар күпме? Сораштыруны карагыз
Документ чаралар комплексын күздә тота, алар арасында:
- «дәүләт хезмәтләре»ндә (Госуслуги) сим-карталарны дистанцион рәсмиләштерүгә үз-үзеңә тыю билгеләү (самозапрет) мөмкинлеге барлыкка киләчәк;
- аларны өченче затларга тапшырырга ярамый, ләкин якын туганнарына ярый;
- россиялеләр халыкара шалтыратуларга, шулай ук спам-шалтыратуларга һәм СМС-таратуларга тыю урнаштыра алачак;
- шәхси кабинеттагы серсүзне алыштырганда кулланучы 2 хәбәр алачак: беренчесе – кисәтү, икенчесе –раслау коды;
- «дәүләт хезмәтләре»ндә хәбәрләр, шул исәптән раслау коды, телефон сөйләшүе вакытында килмәячәк;
- «дәүләт хезмәтләре» шәхси кабинетыннан һәм банк кушымталарыннан баш тартканда иске телефон номеры автомат рәвештә бетәчәк;
- чакырулар маркировкаланачак – кулланучыда оешма исеме чагылачак;
- дәүләт органнарына, банкларга, элемтә операторларына һәм цифрлы платформаларга клиентлар белән аралашу өчен чит ил мессенджерларын куллануны тыячаклар;
- шундый ук тыюны көн саен 500 меңнән артык кулланучы керә торган товарлар һәм хезмәтләр агрегаторлары, сайтлар һәм сервислар хуҗалары өчен дә билгеләячәкләр;
- банкларны банкоматта клиентның ихтыярыннан башка акча алу булмаганмы икәнлеген тикшерергә мәҗбүр итәчәкләр, һәм әгәр алар булган икән – 48 сәгатькә акча бирүне чикләячәкләр;
- әгәр шикле гамәлләр теркәлгән булса, банкоматларда операцияләрне туктатачаклар;
- банклар антифрод-чараларны онлайн-түләүләргә генә түгел, банкоматларга да таратырга тиеш булачак;
- россиялеләр микрозаймнар алганда биометрияне куллана алачак;
- мәгълүмат һәм коммуникация технологияләрен кулланып кылына торган хокук бозуларга каршы торуның дәүләт мәгълүмат системасы төзелә.
Закон, башка сроклар каралган нигезләмәләрдән тыш, 1 июньнән үз көченә керәчәк.