Бүген Россия президенты Владимир Путин «Сезнең двойникларыгыз күп, дип әйтәләр, шул дөресме?» дигән сорауга җавап бирде.
Бу сорау видеоязмада иде. Сорау бирүче – Владимир Путинга бик нык охшаган кеше, ул Санкт-Петербургтан исемен әйтергә теләмәүче студент буларак тәкъдим ителде. Чынлыкта бу – нейросеть ярдәмендә эшләнгән видео.
Владимир Путин моңа җавап итеп болай ди:
«Менә мин сезгә карап торам да, сез миңа охшагансыз һәм минем тавыш белән сөйләшә аласыз. Ә мин уйлап карадым да үземә охшаган һәм минем тавыш белән сөйләшә ала торган бер генә кеше була ала. Һәм ул кеше – мин. Бер кеше шулай дип шаярткан иде…» – ди ул һәм шул «двойник» биргән икенче сорауга – роботлар турындагы сорауга җавап бирә башлый. Аннары кабат бу темага әйләнеп кайтып: «Бу – минем беренче «двойник», – ди.
