Пуховикны югач, йонын ничек кабартырга?
Пуховикны химчисткага бирү шактый кыйммәткә төшә, ә юешләп югач, эчендәге йон укмашып ката.
Кер машинасында юганнан соң пуховикны рәткә китерү ысулы киңәшләр сайтында чыкты.
Юылган һәм юеш пуховикны иңбашлы элгечкә элеп киптерегез. Бу очракта эчендәге йон куртка итәгенә җыелып кибә. Юеш чакта ук йонны кул белән тигезләбрәк куегыз.
Урамда салкын булса, пуховикны балконга чыгарып эләргә була. Каткан йонны таратып күпертү җиңелрәк.
Киптергәндә пуховикны берничә тапкыр алып, мендәр кебек бәргәләп күпертегез. Кипкән куртканы шкафка алып куярга ашыкмагыз, бүлмәдә эленеп торсын.
Тузансуырткычтан һава өрдереп, пуховикны күпертеп була. Башта киптерегез, аннары тузансуырткыч белән бөтен җирен күпертеп чыгыгыз.
Пуховикны уклау белән дә күпертеп була. Куртканы каты өслеккә җәеп салыгыз һәм уклау белән камыр җәйгән кебек йөртегез.
Юка пуховик өчен фен да ярдәм була. Фенның һава агымын куртканың йоны укмашкан урыннарына юнәлтегез. Бераз чеметкәләп алып, фен белән һава өрдереп алсагыз, кием тигез булып күперер, диелә хәбәрдә.