Мөселман хатын-кызлары өчен баш киемнәре бренды булдырган популяр блогер Дилбәр Закирова кияүгә чыккан. Блогер мәҗлестән видеолар белән уртаклаша һәм әлеге мөһим чара барышында иренең дә, үзенең дә бик нык каушауларын шаян рилс аша җиткерә.
«Монда без икебез ике почмакта, ялгышмас өчен, никахта әйтәчәк сүзләребезне кабатлыйбыз.
Ә нәтиҗәдә, мин «риза булып бардым» сүзе урынына «хатын булып бардым» дип әйттем.
Ренат исә хәзрәтнең «Ренат әфәнде, сез Илгиз кызы Дилбәрне хәләл җефетлеккә риза булып алдыгызмы?» – дигән соравына: «Үземнең теләгем белән Илгиз Дилбәр кызын алдым», – дип кабатлады», – дип яза ул видео янына.
Әле ярый рәхәтләнеп көлешкән халыкны зыялы хәзрәт бик тиз генә тынычландыра. «Кеше каушый, җәмәгать. Мондый хәлләр була, бернәрсәсе дә юк», – дип дәвам итә ул никах мәҗлесен.
«Ничек күңелле никах. Гомерлеккә истә калырлык булган», «Сез бигрәк сөйкемлеләр», «Бәхетле гомер кичерегез. Бу видеоны караудан ничек туктарга», – дип көлешкән блогерның дуслары да.