Уфада үзен баласы белән дорфа тоткан хатын-кызны кулга алганнар. Инорс микрорайонындагы тулай торакларның берсендә подъезддагы камералар хатын-кызның сүгенә-сүгенә кечкенә улын кыйнавын төшергән. Бу хакта «Башинформ» хәбәр итә.
Видео массакүләм мәгълүмат чараларында һәм социаль челтәрләрдә урнаштырылганнан соң, хокук саклау органнары тикшерү башлаган. Баласы белән дорфа кыланган ананың шәхесе бик тиз ачыкланган. Ул әлеге тулай торакта мәктәпкәчә яшьтәге улы белән бүлмә арендалап торучы 34 яшьлек хатын-кыз булып чыккан. Хатын-кыз ата-ана бурычларын тиешенчә үтәмәүдә гаебен тулысынча таныган. Ул баласын кыйнаганда исерек хәлдә булуын әйткән. Мондый хәл башка кабатланмаячак, дип вәгъдә иткән малайның анасы.
Тикшерүчеләр «Балигъ булмаган баланы тәрбияләү бурычларын үтәмәү» маддәсе нигезендә җинаять эше ачкан.
Башкортстан Эчке эшләр министрлыгы матбугат хезмәтендә хәбәр итүләренчә, малайны вакытлыча Уфа шәһәре гаилә үзәгенә урнаштырганнар.