Чаллының бер йортына куелган «акыллы» домофон бик кызыклы күренешне теркәп калдырган. Бер әби күршеләре белән подъезд төбендә кич утырганда вакытын бушка уздырмый – өздереп, татарча бии. Видеоны «Челны онлайн» төркеменә куйганнар.
Видео халыкның кәефен күтәргән. «Безнең 32нче бистәдә – иң шәп әбиләр. Иртән кибеттә тавышланалар, көндез тозлы кыяр һәм носки саталар, ә кичләрен подъезд төбендә дискотека оештыралар. Яратам»;
«Бу апайлар бөтен интернетка танылганнарын белмиләр дә инде»;
«Бигрәк күңелле сездә. 32нче бистә әбиләре тулы бер позитив икән»;
«Өздерә бит үзәкләрне. Менә шундый яңалыкларны күбрәк куярга кирәк»;
«И маладис, әбекәй. Бу кызларга баянчы кирәк», – дип, уңай комментарийлар аша сәлам юллаган шәһәрдәшләре биюче әбигә.
Бу «акыллы» домофоннар нәрсә генә күрми, диярсең.