«Плитә эчендәге рәшәткә ник кирәк булуын 40 яшемдә генә белдем. Аның 4 куллану ысулы белән уртаклашам», – дип яза бер хуҗабикә киңәшләр сайтында.
«Күп еллар буе духовкадагы металл рәшәткәнең тәгаен максаты минем өчен сер булып кала бирде. Мин һәрвакыт аңа табаларны, камыр ризыклары салынган формаларны куйдым, һәм бу – аның бердәнбер роле дип уйлый идем: терәк буларак хезмәт итү. Әмма чынбарлык күпкә кызыклырак булып чыкты», – ди бу ханым.
Тостер урынына гади ысул
Безнең йортта – гадәти газ плитәсе һәм духовка. Мин анда еш кына камыр ризыклары пешерәм, тавыкны махсус капчыкларда яки табада кыздырам – һәрвакыт рәшәткәне нигез итеп кулланам. Бервакыт кызым, телевизордан тапшыру караганнан соң, тост ясап карарга теләде, ләкин бездә тостер юк иде. Интернетта эзләп, шаккатмалы ачыш ясадым.
Духовкадагы рәшәткәнең тостерны бик яхшы алыштыра алуын белдем. Кибеттән туралган батон сатып алдым, рәшәткә астына пергамент җәелгән таба куйдым һәм икмәк телемнәрен рәшәткәгә урнаштырдым. 15 минутта искиткеч тостлар әзер булды – кызым бик шатланды.
Ел әйләнәсе өйдә шашлык
Рәшәткә ярдәмендә яшелчәләрне кабыгында кыздырып була. Бәрәңге, борыч, баклажан, помидор яки кабакны шулай пешерәсең. Ит яратучылар кечкенә ит кисәкләрен шпажкаларга тезеп, рәшәткә өстенә куеп, шашлык ясый ала. Астына май һәм сок җыю өчен таба куярга онытмагыз.
Бәйрәм өстәле өчен үзенчәлекле закуска
Рәшәткә оригиналь ризыклар әзерләү өчен дә менә дигән җайланма булып чыкты. Яңа ел кебек бәйрәмнәр якынлашканда, кунакларны гаҗәпләндерерлек яңа рецептлар эзлибез. Духовка рәшәткәсе мексика закускасы – такос өчен нигез әзерләргә ярдәм итә. Гадәти ләвәштән түгәрәк формалар киселә, алар рәшәткә өстенә эленеп, 15 минут пешерелә.
Нәтиҗәдә килеп чыккан каты нигез салат яфраклары һәм төрле эчлек белән тутырыла. Ит, суган, томат пастасы, болгар борычы һәм кукуруздан әзерләнгән эчлек өстенә сыр сибелсә, бик тәмле була. Эчлек өчен вариантлар күп – һәркем үз зәвыгына туры килгәнен табар.
Тавык ботларын яңа ысул белән әзерлибез
Закускалардан соң, төп ризык турында уйларга кирәк. Кош итен гадәттәге пакетларда яки формада пешерүне күпкә гадиләштерергә мөмкин. Иң уңайлы ысул – маринадланган яки тәмләткеч сибелгән тавык ботларын турыдан-туры рәшәткәгә урнаштыру. Астына таба куела, аны бәрәңге белән тутыру яхшырак, чөнки ул аккан майны сеңдереп, искиткеч тәм ала.
