Пластик тәрәзәләр озак хезмәт итсен, еллар дәвамында кыяфәте үзгәрмәсен өчен, аларны абразив материаллар һәм каты щеткалар белән юарга ярамый. Киңәшләрне төзелеш белгече Федор Васильев бирде, дип яза «Лента.Ру» сайты.
Пластик тәрәзәләрне юу өчен, уксус белән судан (1:3 нисбәтеннән) ясалган җиңелчә эремә – иң әйбәте. Мондый су белән юганда, тәрәзәләрнең функциональлеге озак саклана. Моннан тыш, тәрәзә юа торган махсус сыеклыкны җылы суга өстәп тә юарга була.
«Бервакытта да абразив матдәләр яки каты щеткалар кулланмагыз: алар бик вак кына ярыклар калдыра һәм, тора-бара, тәрәзә пыяласын тоныкландыра. ПВХ кысаларны сабын эремәсе кулланып йомшак губка белән юарга, соңыннан бик яхшылап корытырга кирәк», – дип аңлаткан Федор Васильев.
Шулай ук елына 1 тапкыр тәрәзә фурнитураларын силикон май белән майларга кирәк, ул механизмнарның эшләү срогын арттыра. Белгеч тәрәзәләрнең герметиклыгын тәэмин итү торган резин тыгызлагычларны да карап торырга киңәш итә.
«Резин тыгызлагычлар – пластик тәрәзәдәге иң йомшак урын. Алар корымасын, ярылмасын өчен, вакыт-вакыт глицерин сөртеп торыгыз. Бу гади генә нәрсә аларның хезмәт итүен арттыра һәм тәрәзәләрнең герметиклыгын саклый», – дигән белгеч.