Пластик шешәләр ярдәмендә ничек итеп кондиционер ясарга?

Көнкүреш җайланмасы — кыйммәтле кондиционерны, әлбәттә, кибеттән сатып алып була. Тик бу приборны өйдә үз кулларың белән дә ясарга мөмкин. Бу турыда «Челнинские известия» хәбәр итте. 

Литр ярымлы шешәнең төбен кисеп, капкач кебек итеп ясагыз. Шешә стенасына тишекләр тишкәлеп чыгыгыз. Моның өчен тимер кадак яки отвертка ише әйберне җылытып кулланып була.

Барлыкка килгән савытка боз шакмаклары тутырыгыз. Шушы савытларны канцелярия скрепкасы яки җепләр ярдәмендә вентиляторның сеткасына беркетеп куегыз. 

Шешәләрдәге боз салкынын вентилятор бүлмәгә өреп таратыр. Боз эрегәндә тамчы тамар инде, аны сөртеп аласы булыр. Чүпрәк яки берәр савыт куярга да була.

Электр җиһазы белән сак эшләгез, ток суга күрмәсен.