Пензада өч миллион ришвәт алмаган түрәгә премия биргәннәр
Губернатор Олег Мельниченко сүзләренчә, «Пенза өлкәсендә вазифаларны акчага сатып алырга мөмкин булган вакытлар узган».
Пенза өлкәсе вице-губернаторы Сергей Федотов 3 миллион сум ришвәттән баш тарткан. Хәзер аңа 47 мең сум премия биргәннәр. Бу турыда РБК яза.
Декабрьдә биредәге бер түрә хатын вице-губернаторга 3 миллион сум тәкъдим итә. Ул Каменский район администрациясе башлыгы вазифасына бәйгедә җиңү өчен була. Тик вице-губернатор баш тарта һәм хокук саклаучыларга хәбәр итә. Түрә хатынны өй сагына алалар, ул гаебен таный.
Федотов 47,2 мең сум премиясен «Русфонд» ярдәм фондына күчергән.
Губернатор Олег Мельниченко сүзләренчә, «Пенза өлкәсендә вазифаларны акчага сатып алырга мөмкин булган вакытлар узган». «Моны аңламаучылар, тәртипле булыгыз. Пенза өлкәсендә вазифа сатып алырга маташучыларның һәркайсын шундый язмыш көтә», — дигән ул.