Юрист Вадим Виноградов сүзләренчә, гражданнар еш кына «пенсияне автомат рәвештә билгеләрләр» дип саный. Ләкин бу – хата. Пенсиягә чыгар алдыннан һичьюгы 1 ай алдан гариза һәм документларны тапшырырга кирәк. Бу турыда «Челнинские известия» яза.
Моның өчен Соцфондка шәхсән барырга, яки документларны почта аша җибәрергә, яки МФЦ яисә Дәүләт хезмәтләре порталында, яки эш бирүче аша рәсмиләштерергә була.
Социаль фонд документларны кимендә 10 көн карый.
Әгәр кеше гариза язуны үз гаебе белән соңга калдырса, пенсияне гариза теркәлгән вакыттан башлап түлиләр.
Тоткарлык Соцфонд гаебе белән булса, пенсияне срокларын чикләмичә бирәләр.
Гражданин пенсиясен пенсия яше җиткәннән соңрак рәсмиләштерергә теләсә, түләү арттырылган күләмдә була. Бу – иминият түләве ел саен тиешле премиаль коэффициентларга карап арту белән бәйле, диелә хәбәрдә.