Гаиләдә пенсионер кеше үлсә, аны җирләү чыгымнарының бер өлешен Россия Пенсия фонды күтәрә. Җирләү өчен социаль пособие соңгы юлга озату оештырган якын туганнарның берсенә түләнә. Андый кеше булмаса, соңгы юлга озатуны оештырган дустына яки хезмәттәшенә бирелә. Бу турыда ТАСС яза.
Гаиләсе, дуслары булмаган ялгыз пенсионерларны шушы акчага социаль хезмәтләр җирли.
Әлеге ярдәм чарасы эшләми торган пенсионерларга кагыла. Акча Пенсия фондының мәрхүм пенсия алган бүлегендә мөрәҗәгать иткән көнне үк бирелә. Аны кеше үлгән көннән соң 6 ай эчендә алып була.
Мәрхүм банк картасыннан соңгы пенсиясен яки аның өлешен алып бетермәгән булса, акча мирас объекты булмый. Ул мәрхүм үлгәндә аның белән яшәгән гаилә әгъзаларына бирелә. Алар берничә булса, акча тигез итеп бүленә.
Пенсионер үлгәч, әгәр гаилә әгъзалары дәгъва белдермәгән булса, 6 айдан соң бу сумма үлгән кешенең мирасына өстәлә һәм гомуми нигездә бүленә.
Татарстан ЗАГС рәсми сайтында хәбәр ителгәнчә, акчаны алу өчен гариза бирүченең шәхесен раслый торган документ, социаль пособие алу өчен гариза, үлгәндә пенсионерның эшләмәвен дәлилли торган доумент (мәсәлән, хезмәт кенәгәсе) кирәк.