«Пенсионер карчыкның башы киселгән». Әби белән бабайны үз фатирында вәхшиләрчә үтергәннәр

Саров шәһәрендә ике пенсионер мәетен тапканнар. Аларның гәүдәләрен мәсхәрәләгәннәр. Әбинең башын кисеп алганнар. Бу турыда Тикшерү комитетына сылтама белән «Комсомольская правда» яза.

4 декабрьдә үз фатирларында ике пенсионер мәете табыла. 78 яшьлек ир-ат һәм 77 яшьлек хатын-кыз биредә яши. Бабайның гәүдәсендә пычак белән яралаган эзләр була, әбинең башын кискәннәр.

Әлеге коточкыч җинаятьне кем кылганы билгесез. Үтерүчене эзлиләр. Җинаять эше ачылган.

Фатирда төшерелгән кадрларга караганда, пенсионерлар бай яшәми, анда алыр әйбер дә юк кебек. Фатирда барысы да тыйнак, ләкин чиста. Үтерүчеләр исә бик вәхшиләрчә кыланган: бөтен җирдә кан табы – диванда да, ваннада да, идәндә дә, диелә бу хәбәрдә.