Пенсионер бабай, Мальдивка бергә барабыз дигәнгә ышанып, бер хатынга 2,4 миллион биргән

Пушкино шәһәрендә яшәүче 73 яшьлек пенсионер бабай 38 яшьлек хатын белән танышкан. Бу хатын пенсионерга чит илләргә ял оештыра торган танышлары турында сөйли. Алар, бергә Мальдив утрауларына ял итәргә барырга, дигән карарга киләләр. Яхшы ял оештыручы дусларыннан тыш, бу ханым пенсионерга үзенең компаниясендә онытылмаслык көннәр (һәр төннәр) вәгъдә итә.

Пенсионер ханымга 2,4 миллион сум акчасын бирә. Акчаны бирүгә, хатын вәгъдәләрен оныта, тур кичектерелә башлый. Ял турында кызыксынгач, бу хатын «акчаны караклар урлады» дип җавап бирә, әмма гаҗәп – акчаны урлаулары турында полициягә хәбәр итми. Ул шалтыратуларга бөтенләй җавап бирми башлагач кына, пенсионер үзенең алдануын аңлый һәм полициягә мөрәҗәгать итә.

38 яшьлек хатын мошенниклыкта шикләнелә, аны полиция эзли, ә бабай Мәскәү өлкәсендәге кар көртләренә карап кына ял итә, дип яза SHOT.