Педофил, үзен табиб дип алдап, мәктәп раздевалкасында үсмер кызны мыскыл иткән
Коточкыч хәл Коми башкаласы Сыктывкар шәһәрендәге сәнгать мәктәбендә була.
Сыктывкар мәктәбенә 45 яшьлек ир килә һәм сакчыларга үзен бер баланың атасы дип әйтә. Мәктәп эченә кергәч, ул үзен табиб дип таныштыра, "күренергә" дип 12 яшьлек кызны раздевалкага чакыра. Массакүләм мәгълүмат чаралары язуынча, ул кызны көчләгән. Ул кулга алынган, моңа кадәр утырып чыккан кеше булуы ачыкланган.
Мәктәп җитәкчелеге исә педофил кызны көчләгән дигән сүзне кире кага. "Ул 12 яшьлек кызны көчләмәгән, чишендереп "караган гына", - дигән мәктәп директоры.
Сыктывкар чатында мәктәп җитәкчелеген тәнкыйть утына тоталар. "Чынлап та баласы артыннан килгән аналарны кертмиләр, ә рецидивистны кертәләр". "Нигә сак хезмәте өчен акча җыялар". "Рецидивист иректә рәхәтләнеп йөри", - дип язалар. Педофилларга үлем җәзасы кертергә кирәк дип язучылар да бар.