Җырчы Ильмира Нәгыймова, Марат Яруллин белән аерылышканнан соң тормышы җайланып китүе, сәламәтлеге белән проблемалары кимүе хакында сөйләгән.
«Мин тынычландым, дуслар, Аллаһыма мең шөкер. Паник һөҗүмнәрем бетте. Инде ярты ел алар юк. Моңа кадәр, бик еш була иде… Организм барысын да сизгән», – дип язган ул, «подписчик»ларының сорауларына җавап биреп.
Ильмира паник атакалар, ягъни паник һөҗүмнәрдән интегүе хакында үзенең сәхифәсендә сөйләгән иде. Аз гына борчылса да, җырчыга һава җитми, ул тыела алмыйча елый башлый. Аңын җуйган вакытлары да була. Ильмира Нәгыймова бу хәлдән табиблар да, антидепрессантлар да булышмавы хакында әйткән иде.
