«Әниләр советы» рәисе, Дәүләт Думасы депутаты Татьяна Буцкая Россиядә 50 ел һәм аннан да күбрәк бергә гомер иткән парлар өчен 20 мең сум күләмендә бердәм федераль түләү кертергә һәм аны алга таба индексацияләргә тәкъдим итте. Россия Хезмәт министрлыгы башлыгы Антон Котяков исеменә юлланган тиешле мөрәҗәгать турында РИА Новости яза.
«РФ субъектларына 50 ел һәм аннан да күбрәк бергә яшәгән гаиләләрне котлауга бердәм юнәлешне тәэмин итәргә, нәкъ менә туйның 50 еллыгына кимендә 20 000 сум күләмендә бәяне ориентир итеп билгеләргә һәм аны алга таба индексацияләргә яисә аннан соңгы юбилей даталарына түләүләрне пропорциональ рәвештә арттырып барырга киңәш итүне тәкъдим итәбез», – диелә документта.
Депутат билгеләп үткәнчә, аерым төбәкләрдә мондый чаралар инде гамәлдә.
«Озак еллар дәвамында рәсми никахта яшәү шәхси гаилә кыйммәте генә түгел, ә тотрыклылыкның, үзара ярдәмләшүнең һәм традицион гаилә мөнәсәбәтләрен саклауның җәмгыять өчен мөһим үрнәге дә булып тора, дип саныйбыз», — дип билгеләп үтелә мөрәҗәгатьтә.
Депутат фикеренчә, әлеге чара гаилә институтын ныгытуга, озак еллар бергә яшәгән парларны җәмгыятьтә тануны арттыруга һәм Россиядә гаилә кыйммәтләренә ярдәм итүдә бердәм якын килүне формалаштыруга ярдәм итәчәк.