Башкортстанның Дәүләт хезмәт инспекциясе 63 яшьлек ир-ат һәлак булган очракны тикшереп бетергән. Эшче коточкыч үлем белән үлгән, дип яза «Башинформ».
Эретеп ябыштыручы булып эшләүче ир-ат Ишембай «Межрайкоммунводоканал» цехының суүткәргечләрен төзәткәндә гадәттән тыш хәл була.
Ведомствоның матбугат хезмәте хәбәр иткәнчә, 3 августта Комаров урамында салкын су торбасы ага башлый. Бирегә эшчеләр бригадасы килә. Үткәргечне төзәтер өчен, ике метр тирәнлектә траншея казыйлар. Мәрхүм ир-ат шунда төшеп эшли башлый. Шул чакта грунт убылып төшә, ир-ат туфрак астында кала. Аның бик күп кабыргалары сынып бетә. Ир-атны Ишембай хастаханәсенә илтәләр, 9 августта ул үлә.
Бәхетсезлек очрагы эшләрне тиешенчә оештырмау сәбәпле килеп чыкканы ачыкланган. Тупланган материаллар тикшерү органнарына тапшырылды, диелә хәбәрдә.