«Өстемә утырып, шешә белән кыйнады». Энесе чыгып киткәч, абый кеше киленне имгәткән

Ростов өлкәсенең Батайск шәһәрендә яшәүче ир-ат абыйсының хатынын кыйнаган. Ул абыйсы поликлиникага киткәч, киленгә һөҗүм иткән. Аңа карата җинаять эше ачылган. Бу турыда «Комсомольская правда» хәбәр итте.

49 яшьлек Сергей хатыны Наталья һәм абыйсы Евгений белән ике бүлмәле фатирда яши. Фатир аларга абыйсы белән икесенә мирас булып калган, аерым фатирлар ала алмаганнар. Евгений хәмер белән мавыга башлый, финанс проблемалары да, шәхси борчулары да була.

Җинаять булган көнне ул тагын кайдадыр салып йөри, өйгә иртәнге өчтә кайта, тавышлана, Сергей белән Натальяны уята. Иртәнге 7ләр тирәсендә Евгений тынычланган кебек була, Сергей аны йоклады дип уйлый һәм поликлиникага китә.

Евгений Натальяга ташлана. «Мин тыныч кына бүлмәдә утыра идем, кисәк кенә Евгений ишекне ачты, кулында табуретка иде, шуны миңа ыргытты», – ди Наталья.

Аннары Евгений киленне пыяла шешә белән кыйный. «Ул мине идәнгә екты. Корсагыма егылдым, ул өстемә утырды, мине шешә белән кыйнады. Аңымны югалткан кебек булдым. Каршы тормадым, бер сүз әйтмәдем. Ыңгыраштым гына», – ди Наталья.

Абый чыгып киткәч, килен телефонын табып, «ашыгыч ярдәм» чакыра. Аның сул күзенең аскы стенкасы сынган, сетчаткасына зыян килгән, борыны сынган, баш мие селкенгән. Хатынны хастаханәгә салганнар.

Башта җинаять эше ачылган. Тик аннары, туганнар килешү сәбәпле, эшне япканнар, диелә хәбәрдә.