Осиново бистәсендә 4 яшьлек бала унынчы кат тәрәзәсеннән егылып төшеп һәлак булган

Осиноводагы «Радужный» торак комплексында 4 яшьлек бала унынчы каттагы тәрәзәдән егылып төшкән. Фаҗига 15 июнь көнне көндезге сәгатьләрдә булган. ТР прокуратурасы мәгълүматлары буенча, полициягә хәбәр 14:52 сәгатьтә килгән. Бу хакта «Татар-информ» хәбәр итә.

Күзәтчелек ведомствосы мәгълүматы буенча, бала өлкәннәр күрмәгәндә москит челтәренә таянган һәм тәрәзәдән егылып төшкән. Алган җәрәхәтләрдән ул урында ук үлгән.

Фаҗига урынына Яшел Үзән шәһәре прокуроры Дмитрий Ерпелев килгән. Тикшерү башланган, аны шәһәр прокуратурасы контрольдә тота.

Күзәтчелек ведомствосы ата-аналарны балаларны караучысыз калдырмаска чакыра, диелә хәбәрдә.