Организмга В12 витамины җитмәвен ничек белеп була?
В12 витамины җитмәгән кешеләрнең тәне аксыл яки сары төсмерле була.
Нутрициолог Анастасия Гаврикова сүзләренчә, табибка мөрәҗәгать итмичә, анализлар тапшырмыйча да, организмга В12 витамины җитмәвен белеп була. Бу турыда РИА Новости яза.
В12 витамины нерв күзәнәкләре сәламәт, нерв импульсын тапшыру функциясе яхшы һәм ашказаны-эчәклек тракты эшчәнлеге нормада булсын өчен кирәк.
Белгеч сүзләренчә, В12 витамины җитмәүне берничә билге күрсәтә. Беренче чиратта, бу — тән тиресе төсе. В12 витамины җитмәгән кешеләрнең тәне аксыл яки сары төсмерле була.
«Гел арыганлык хисе дә В12 витамины җитмәүдән була. Хәтер белән проблемалар, кәеф үзгәрү, ялкынсынган кызыл төсле тел дә шушы проблеманы күрсәтергә мөмкин», — ди ул.
В12 витамины бавыр, диетик ит, балык, диңгез ризыклары, йомырка составында була, ди белгеч.