«Операциядән соң мин бер ай буе йөзтүбән генә яттым»

Уңышсыз шаярту

Станислав Шауклис хәзер, еллар узгач, бу драматик очракны искә төшерәме? Бу турыда «Челнинские известия» сайтына Ләлә Гайфетдинова язган. 

«Нигә искә төшерергә? Мин үткәнгә кире кайтырга теләмим, – ди Станислав. – Мине гадәти тормышка кире кайтарган доктор Пардабой Тухтарович Абдуллаевка бик рәхмәтлемен. Мин аңа һәрвакыт сәламәтлек телим. Операциядән соң мин 1 ай буе йөзтүбән генә яттым, ашый да алмадым, мине таякчык аша гына ашаттылар».

Әлеге фаҗига Кама елгасында, «Маяк» мотор станциясеннән ерак түгел була. Эссе көнне югары сыйныф укучылары анда су коенырга бара. Алар барысы да шәһәрнең яшьләр йөзү җыелма командасы әгъзалары була. Көтмәгәндә офыкта моторлы көймә пәйда була һәм аны йөртүче шаяртырга була: дулкыннар белән уйный башлый. Ул шул дәрәҗәдә азартка кереп китә, корабка бик якын булган Стас Шауклисны бәрдергәнен күрми дә кала. 

Моторның әйләнеп торучы винтлары егетнең аркасына тия, ул коточкыч авырту сизә, аяклары белән хәрәкәт итәргә тырыша, ләкин аларны сизми. Кычкыруларны ишеткәч һәм судагы канлы тапны күргәч, көймә белән идарә итүче: «Барыгыз да исәнме?» – дип кычкыра. Аннан Стасны аркасыннан кан аккан хәлдә елгадан тартып алалар.

Куркып калган көймә хуҗасы «ашыгыч ярдәм» чакыра, ул зыян күрүче малайны балалар хастаханәсенә алып китә. Травматология бүлегенең танылган табиб-хирургы Пардабой Абдуллаев аңа 3 сәгать дәвамында операция ясый.

Уникаль операция

Табиб Станиславны «күлмәк белән туган» дип сөйли. Тәҗрибәле хирург мондый операцияне беренче тапкыр ясый: мәктәп укучысын кисәкләп җыярга туры килә.

1 айдан соң Станислав үз аягына баса: аңа спорт белән шөгыльләнгән булуы ярдәм итә, чөнки 7 яшеннән ул җитди рәвештә йөзү белән шөгыльләнә. Иң дәрәҗәле ярышларда 60 медаль яулаган яшүсмергә йөзәргә генә түгел, йөрергә дә яңадан өйрәнергә туры килә. Әнисе Оксана Юрьевнаның кайгыртуы зур роль уйный, ул көне-төне улы янында була.

Башта ул таякка таянып йөри. Аннары бассейнга күнегүләргә йөри башлый: сәламәтләнү өчен, аңа бу күнекмәләр бик кирәк була. Станислав «Олимпийский» бассейны җитәкчелегенә бик рәхмәтле, бигрәк тә аңа улы кебек караган тренеры Лиса Павловна Хяккиненга. 1 елдан соң ул кире үз формасына кайта: Дзержинск шәһәрендә узган терәк-хәрәкәт аппараты зыян күргән спортчылар арасында Россия Кубогына йөзү буенча ярышларда 3 медаль яулый.

Суд һәм җәза

Моторлы көймә белән идарә итүчегә килгәндә, ул җәзадан качарга тырыша. Ләкин 1 елдан соң суд аны 240 мең сум компенсация түләргә мәҗбүр итә. Бу карарны 4 ел көтәргә туры килә. Гаепләнүче – шәхси эшмәкәр, приставларга аның көймәсе һәм автомобиленең әнисенеке булуын, үзенең 8000 сум гына хезмәт хакы алуын һәм эшсез хатынын һәм мәктәп укучысы улын каравын раслаган документлар тапшыра. Ул, зур «тәнәфесләр» белән, зыян күрүченең исәбенә 3-4әр мең сум гына акча күчерә. Суд приставлары аның фамилиясен бурычлыларның «кара исемлеге»нә кертә, чит илләргә сәяхәт итүен тыя, шуннан соң гына ул тиешле акчаны түли.

Ахыр чиктә Станислав хисабына кергән акча тулысынча табиблар консультацияләренә, реабилитация курсларына, процедураларга, препаратларга китә.

Таягым һәрвакыт кул астында

Стас җәрәхәт нәтиҗәләрен әле дә сизүен әйтә. Озак ятканда, аркада авырту барлыкка килә, дип сөйли.

«Кыш көне, аяк астында кар һәм боз булганда, таяк белән йөрергә туры килә. Нерв күзәнәкләре тулысынча кире кайтмады, шуңа күрә кайчак аяклар ойый», – дип сөйли ул.

Станислав Шауклис КФУ филиалын тәмамлый, анда машина төзелешендә конструкторлык-технологик тәэмин итү кафедрасында укый. Хәзер аңа 29 яшь, «Спецавтокама»да әйдәп баручы инженер-конструктор булып эшли.

«1нче курста укыганда актив рәвештә йөзү белән шөгыльләндем, ярышларда катнаштым. Соңыннан дәресләр һәм күнегүләрдә тоткарлыклар барлыкка килде, авыр була башлады, йөзүне ташларга туры килде», – дип сөйли ул. 

Чаллы спортчысының спорт казанышлары турында күпсанлы медальләре бар. Коллекцияләре артыр, дигән өмет тә бар: гаиләдә булачак спортчы, уллары Михаил үсеп килә. Аңа әлегә 8 ай гына, әмма, яшь әтисе билгеләп үткәнчә, ул хәзердән үк суны һәм йөзүне бик ярата. Тренеры да янәшәдә – әнисе Элиза декрет ялына кадәр «Олимпия» бассейнында эшләгән. Станислав белән алар шунда танышкан, бергәләп ярышларга йөргәннәр.