Сөт бизләренең формасы, күләме яки структурасы үзгәрү онкология авыруының беренче билгеләре булырга мөмкин. Бу турыда Мәскәүнең баш онкологы Игорь Хатьковка сылтама белән «Радио 1» сайты яза.
Табиб сүзләренчә, күкрәктә тыгызлыклар, төерләр барлыкка килүгә һәм тукымаларның текстурасы үзгәрүгә игътибар итәргә кирәк. Бигрәк тә бу билгеләр белән бергә авырту яки бүлендекләр булса, аеруча игътибарлы булырга кирәк, дигән табиб.
Имчәктән бүлендекләр килү хәвефле билге була ала. Аның фикеренчә, алар зарарсыз шешкә дә, шулай ук яман шешкә дә күрсәтә ала. Теләсә нинди бүлендек булган очракта, бигрәк тә алар озакка сузылса яки көчәйсә җентекле медицина тикшеренүе узарга кирәк, дигән Хатьков.