«Олы улының үлеме иң куркынычы иде». Өч баласын үтергән ана ирен җеннән коткарасы булган

26 декабрьдә Екатеринбургта 37 яшьлек Анастасия П. өч баласын үтерә. Аны шул ук көнне тоткарлыйлар. Бу турыда «Комсомольская правда» хәбәр итте.

Тикшерү версиясе буенча, ул 10 һәм 15 яшьлек улларын, 6 айлык кызын буып үтерә.

• «Җеннәр ияләшкән». Әни кеше өч баласын үтергән, дип язган идек.

Сайт чыганагы белешмәсе буенча, декабрь уртасында әтиләре Вячеслав «җеннәр күрәм» дип зарлана башлый. Ул хатыныннан үзен кыйнауны сорый, имеш, шулай итеп, җеннәрне куып чыгаралар.

25 декабрьдә Анастасия иренә вакытлыча фатирдан китеп, Чиләбе өлкәсендә туганнарында яшәп торырга сорый. Кич белән хатын урамга йөрергә чыга, аннары ул балаларын үтереп, ирен җеннәрдән коткарырга карар кыла, диелә хәбәрдә.

Олы улының үлеме иң куркынычы була: хатын аның янына килә һәм ике вариант сайларга куша. Берсе – әтисе һәм җеннәр белән калырга, икенчесе – аның белән җәннәткә китәргә. Малай икенче вариантны сайлый һәм анасы билбау белән буганда каршылык күрсәтми.

Өч кешене үтергәч, Анастасия әнисе һәм туган сеңлесенә хәбәр яза, җинаятен әйтеп бирә, балаларына җеннәр керүе турында яза. Аннары туган сеңлесе полициягә хәбәр итә.

Тикшерүчеләр күп балалы ананың анализларында наркотик эзләре таба. Анастасияне үз аңында дип тапсалар, аны 20 елга кадәр ирегеннән мәхрүм итүләре ихтимал. Анастасия – монастырь настоятеле кызы, диелә хәбәрдә.