Бурятиядә 23 октябрь төнендә 64 яшьлек хатынны этләр талап үтергән. Бу турыда «Комсомольская правда» хәбәр итте.
Хойтобэй авылындагы фаҗигадән соң җинаять эше ачылган.
Пенсионер хатын олы яшьтәге туганы һәм аның улы янына кунакка килә. Хуҗаларның ишегалдында 3 зур эт яши. Алар вольерда тора. Кунак хатынны этләр үз итми, өрәләр, өстенә сикермәкче булалар.
Төнлә белән кунак хатын никтер урамга чыга, этләр вольердан чыга һәм хатынга ташлана. Алар хатынның башын, кулларын, аякларын тешли, хатын этләрдән котыла алмый.
Этләр талап ташлаган мәетне иртән генә табалар, диелә хәбәрдә.
