Мәскәү өлкәсендә яшәүче ир-атның колагыннан чын таракан алганнар. Бу турыда өлкәнең Сәламәтлек саклау министрлыгына сылтама белән РЕН ТВ хәбәр итте.
62 яшьлек ир-ат колагы авыртуга зарланып табибларга мөрәҗәгать иткән. Башта ул бу авыртуны үзе бетермәкче була, мамыклы таякчык тыгып чистартмакчы була, тик булдыра алмый, шуннан соң гына табибка бара.
Табиб ир-атның колагындагы тараканны пинцет ярдәмендә чыгара. Аның колагында берникадәр вакыт чын таракан яшәве ачыклана. Аңа ярдәм күрсәтәләр һәм ишетү каналын чистарталар.
Белгечләр колактагы яки борындагы әйберләрне мөстәкыйль рәвештә алырга маташудан баш тартырга чакыра. Үзең чыгарырга маташкан чакта, чит предмет эчкәрәк кереп китүе ихтимал. Вакытында табибка мөрәҗәгать итегез, диелә хәбәрдә.