Җырчы Чәчкә «гашыйклар көне»ндә тормыш иптәшеннән үзен кайчан һәм ни рәвешле ярата башлавын белешкән.
«Бүген Иректән сорыйм: «Син миңа гашыйк булганыңны кайчан аңладың?» – дим.
Без 2011 елда танышып, дуслашып, соңрак бергә концерт-мәҗлесләрдә эшли башладык. 2 елдан гына өйләнештек. Ничек өйләнешкәнне сизми дә калдым, бик тиз булды ул. Хәтта күп дус-туганнарыбыз өчен шок булганын хәтерлим.
«Беренче күрүдән үк ошаттым», – димәсенме Ирек. Шаккаттым. Мин бит аңа 2 ел буе «улым» дип дәшеп йөрдем. Яшь аермабыз 7 ел булгач, энекәшем кебек якын итә идем. Ә ул яратып йөргән икән...
Вәт яңалык булды бу минем өчен. Күңелле яңалык. 10 ел бергә яшибез.
Көн дә бер-беребезгә гашыйк булып яшәргә язсын. «Гашыйклар көне» белән», – дип яза Чәчкә социаль челтәрләрдә.
Виртуаль дуслары Чәчкә белән Ирекнең яшь аермасы сизелмәве, бер-берсенә бик тә пар килүләре хакында язып, кәефләрен күтәргән.