«27 көнлек сабый зәңгәрләнеп килде». Өйдә сөннәтләгәннән соң бала реанимациядә ята

Мәскәү шәһәре буенча Тикшерү идарәсе өйдә сөннәтләгәннән соң баланың реанимациягә эләгү очрагын тикшерә. Бу турыда ведомствога сылтама белән РЕН ТВ яза.

Әти белән әни кеше баланы өйдә сөннәтләү өчен табиб таба. Ул Россиягә укырга килгән чит ил кешесе булып чыга. Табиб барысын да яхшы итеп эшләргә ышандыра. 

Әни кеше сүзләренчә, балага лидокаин уколы кадыйлар, шуннан соң аның хәле китә. Балада аллергия башлана. Шуннан соң сабыйны реанимациягә салалар. Хастаханә табиблары аны хәлен стабильләштерә. Хәзер малайның сәламәтлеге стабиль катлаулы дип бәяләнә. Аның гомере өчен табиблар көрәшә.

Җинаять эше ачылган. өйдә сөннәтләү операциясе ясаган табибны тоткарлаганнар, диелә хәбәрдә.

РЕН ТВ белешмәсе буенча, хәзер баланы үпкәләрне ясалма җилләтү аппаратына тоташтырганнар. 

«Әти кеше 27 көн элек туган баласын сөннәтләү өчен өйгә табиб чакыра. Сөннәтләгәч, баланың сулыш алуы туктала, ул зәңгәрләнә башлый. Сабыйны якындагы хастаханәгә илтәләр», диелә хәбәрдә.