Офис басарга кергән карак шунда ук йоклап киткән

Оренбург өлкәсе буенча Росгвардия хезмәткәрләре берничә тапкыр караклыкта тотылган ир-атны кабат тоткарлаган. Ул офис басарга кергән һәм күн креслода йокыга киткән. Бу турыда ведомстовның матбугат хезмәтенә сылтама белән РЕН ТВ каналы хәбәр итте.

Вакыйга 20 ноябрьдә Оренбург шәһәрендәге администрация бинасында була. Бер компания директоры бинага таныш булмаган кеше үтеп керүе турында хәбәр итә. Ул бу кешене күзәтү камерасы аша күреп алганын әйтә.

Росгвардиячеләр бинадагы бүлмәләрне тикшереп йөргәндә каракны таба. Ул дүртенче каттагы бер бүлмәдә йокыга киткән була. Каракның үзе белән отверткалары, кусачкалары, ачкычлары, сейфтан урланган 140 мең сум акча була.

Тоткарланган ир-ат сүзләренчә, ул баскыч буйлап менгән, тәрәзәне ваткан һәм бу бүлмәгә кергән.