«Өенә кайтып үлде». Сарманда яшәүче хатынны ике таныш хатыны кыйнаган, алкаларын урлаган

Сарман районында яшәүче ике хатын-кызны 64 яшьлек таныш хатын-кыз үлемендә гаеплиләр. Бу турыда Тикшерү комитетына сылтама белән «Татарстан 24» каналы хәбәр итте.

Тикшерү версиясе буенча, 37, 41 һәм 64 яшьлек өч таныш хатын хәмер эчеп утыра. Аннары 64 яшьлек хатынны иптәшләре кыйный. Алар мәрхүмәгә куллары белән суга, аяклары белән тибә, шул исәптән башына да. Аннары яшьрәк хатыннар корбаннарының алкаларын урлый.

Кыйналган хатын өенә кайтып китә. Ул башы имгәнүдән өендә вафат була.

37 һәм 41 яшьлек хатыннарны тикшерү вакытына сак астына алганнар, диелә хәбәрдә.