«Өченче баланы тапканнан соң курку бетте»: Татарстан Рәисе бүләкләгән гаиләләр тарихы

Татарстан Рәисе Рөстәм Миңнеханов һәм аның хатыны Гөлсинә Миңнеханова Казан Кремлендә иң яхшы гаиләләрне кабул итте. Очрашуга республиканың төрле район-шәһәрләреннән 45 пар чакырылган. Алар арасында күп балалы әти-әниләр, гаилә тормышы юбилярлары, махсус операция геройларының әти-әниләре бар иде.

«Ныклы гаилә – Туган илгә тугрылык һәм мәхәббәт, тарихи мираска хөрмәт»

Казан Кремленең Туп сараенда узган тантаналы кабул итүдә бәйрәм мохите хөкем сөрде.

«Гаилә ул – көчле илнең нигезе. Бөек Җиңүнең 80 еллыгы һәм Ватанны саклаучылар елында балаларны сугыш геройлары һәм замандашлары үрнәгендә тәрбияләү, күпмилләтле илебезгә хас булган традицион кыйммәтләрне күрсәтү аеруча әһәмиятле», – дип мөрәҗәгать итте кунакларга Татарстан Рәисе Рөстәм Миңнеханов.

Тантаналы чарага төрле һөнәр ияләре – педагоглар, тәрбиячеләр, төзүчеләр, инженерлар, авыл хезмәтчәннәре, машина йөртүчеләр, китапханәчеләр, шулай ук волонтерлар һәм пенсионерлар килгән иде.

«Ныклы гаилә – Туган илгә тугрылык һәм мәхәббәт, тарихи мираска хөрмәт. Сезнең ата-ана хезмәте иң зур ихтирамга лаек. Сез лаеклы, көчле рухлы балалар тәрбиялисез, алар гаиләнең һәм Ватанның горурлыгы булып үсә», – диде Рөстәм Миңнеханов.

Ул илебез намусын сакларга әзер булган чын яклаучылар үстергән аналарга рәхмәт белдерде. Татарстан Рәисе махсус операциядә катнашучы хәрбиләрнең хатыннарына һәм гаиләләренә аерым рәхмәт сүзләрен җиткерде.

«Сезнең чыдамлык, сабырлык, ярдәм хәрбиләргә үз бурычларын лаеклы үтәргә ярдәм итә, сез – аларның ныклы тылы һәм илһамчысы. Көчегез һәм тугрылыгыгыз өчен рәхмәт», – диде Миңнеханов.

«Сез республикадагы бөтен гаиләләр өчен үрнәк булып торасыз»

Шулай ук Татарстан Рәисе быел яңа социаль ярдәм чаралары кертеләчәген дә әйтте. Бу – күп балалы гаиләләрдәге балаларны һөнәри белем бирү оешмаларында укыту бәясенең 30 процентын компенсацияләү, йөклелек буенча исәпкә куелганда көндезге уку формасындагы студент хатын-кызларга 100 мең сум күләмендә 1 тапкыр бирелә торган түләүләр һәм башкалар.

Балалы гаиләләргә ярдәм итү дәүләт сәясәтенең һәм республика үсеш программаларының төп өстенлеге булып кала, диде Миңнеханов. Ул һәркемгә гаилә иминлеге, тынычлык, сәламәтлек һәм озын гомер теләде.

«Гаилә учагын, андагы җылылыкны саклагыз. Сез республикадагы бөтен гаиләләр өчен үрнәк булып торасыз», – диде ул, йомгаклап.

Тантанада Россия һәм Татарстанның дәүләт бүләкләре тапшырылды. «Ата-ана даны» орден медале белән Әлмәт районыннан Ришат һәм Роза Вәлиәхмәтовлар, Казаннан Рафыйк һәм Рәмзия Йосыповлар бүләкләнде. Ике гаилә дә бишәр бала тәрбияли. Моннан тыш, Түбән Камадан 4 бала тәрбияләүче Михаил һәм Ольга Мешалкиннар да Рәис кулыннан медаль алды.

«Ата-ана батырлыгы» медаленә Арча районыннан 11 бала тәрбияләүче Ирек һәм Минзилә Галиевлар лаек булды.

Чистай районыннан 7 бала әнисе Ләйсән Чернышева, Азнакай районыннан 6 бала әнисе Резидә Габделвәлиева, шулай ук Әлки районыннан 5 бала әнисе Наталья Исаева, Биектау районыннан 5 бала әнисе Айгөл Ташевцева, Лениногорск районыннан 5 бала әнисе Лилия Гыйльметдинова һәм Саба районыннан 5 бала әнисе Гөлнара Рәфыйкова «Ана даны» медале белән бүләкләнделәр.

«Өченче баланы тапканнан соң курку бетте»

Казаннан «Ата-ана даны» орден медале белән бүләкләнгән Рәфыйк һәм Рәмзия Йосыповлар студент елларында, өлкән курсларда укыганда танышкан. Танышып 2 елдан соң, туй уздыралар. Алар 18 ел бергә яши инде.

«Без Татарстан Рәисе кабул итүенә килдек, бу – безнең өчен зур дәрәҗә. 5 балабыз бар, барысы да олимпиадаларда катнаша, җиңә. Спорт ярышларында катнашалар. Олы улыбыз хоккей белән шөгыльләнә, ә кызыбыз театр студиясенә йөри. Хәзер кечкенәләре дә алар юлыннан бара», – дип сөйләде журналистларга Рәмзия ханым.

Ул икътисадчы булып эшли, ә ире – Казан ислам университетында ислам фәннәре факультеты деканы.

«Безнең республикада күп балалы гаиләләр, гомумән бөтен гаиләләр өчен күп нәрсә эшләнелә – пособиеләр түләнә, парклар төзелә. Дәүләт ярдәме бик сизелә», – диде Рәмзия Йосыпова.

Рәфыйк Йосыпов сүзләренә, гаилә бәхете ир белән хатын арасындагы яхшы мөнәсәбәтләрдән, үзара хөрмәттән, ышанычтан һәм таяныч булудан гыйбарәт.

«Авырлыклар алдында куркып калмау да мөһим. Безнең курку өченче балабыз тугач бетте», – дип сөйләде әти кеше.

«Махсус операция хәрбиләренә бергәләп гуманитар ярдәм алып барабыз»

Тимур һәм Дарья Носратовлар Татарстан Рәисе белән очрашуга Чаллыдан килгән. Алар 11 ел бергә яши, 2 бала тәрбияли.

«Без мәктәптән үк бергә. Мин – хәрби, хатыным минем белән бөтен гарнизоннар буйлап йөри. Төньяк Кавказ территориясендә, Кырымда булдык. Таҗикстанда, Әфганстан белән чиктә хезмәт иттем, анда кызыбыз туды», – дип сөйләде Тимур әфәнде.

Ул – махсус операция катнашучысы, штурм төркеме командиры булган. Хәрби бәрелешләр вакытында авыр яралана һәм отставкага җибәрелә.

«Шул вакыттан махсус операция хәрбиләренә һәм аларны гаиләләренә гуманитар ярдәм җыю белән актив шөгыльләнә башладык. Бюрократия мәсьәләләре бар, миндә шәхси тәҗрибә бай. Мөмкин булган бар ярдәмне күрсәтәбез. Күптән түгел хатыным белән махсус операция зонасына гуманитар ярдәм илтеп кайттык», – диде ул.

Алар алгы сафка медикаментлар, гигиена чаралары, җылы киемнәр алып бара. Махсус операция катнашучысы буларак, Тимур Эдуардович күп төрле хәрби бүләкләргә лаек булган. Ул иҗтимагый эш белән актив шөгыльләнә, узган елда республикадагы йөздән артык мәктәптә батырлык дәресләре уздырган. Тормыш иптәше Дарья шәһәрнең Махсус операция ветераннары советында эшли. Ул бәхетле гаилә серен дә әйтте.

«Мәхәббәт үзара хөрмәттән, үзара аңалашып яшәүдән һәм бар нәрсәдә таяныч булудан тора. Озак һәм бәхетле мөнәсәбәтләрнең нигезе шул», – диде ул.

«Аллаһ безгә күп бала бирде, һәм без аңа рәхмәтле»

«Ата-ана батырлыгы» медале белән бүләкләнгән Ирек һәм Минзилә Галиевлар Арча районында яши. Алар 11 бала тәрбияли, бергә 34 ел яшиләр.

«Аллаһ безгә күп бала бирде, шундый бәхетле тормыш биргәне өчен без аңа рәхмәтле», – дип сөйләде гаилә башлыгы.

Ир-ат мәчеттә имам булып эшли. Ә хатыны Минзилә Галиева - сәламәтлек мөмкинлекләре чикле балалар өчен интернат-мәктәптә тәрбияче. 2009 елда ул «Ана даны» медале белән бүләкләнгән. Ул да, гаиләдә иң мөһиме – хөрмәт һәм аңлашып яшәү, дип саный.

«Балалар тууга мөнәсәбәтебезне иман үзгәртте. Ирем 1993 елда мәдрәсәгә укырга керде, шуннан соң тормышка мөнәсәбәтебез бик нык үзгәрде. Без шәригать кануннары буенча яшибез. Анда кыска һәм төгәл әйтелгән: «Балаларыгыз бар икән, аларны югалтмагыз. Аларны сез түгел, ә Аллаһ ашата», – диде күп балалы әни.

Галиевләр әйтүенчә, ислам – яшәү рәвеше. Ә балалар тәрбияләүдә иң мөһиме – ата-аналарның шәхси үрнәге.

«Гаилә кыйммәтләре безнең өчен иң мөһиме. Дөньялыкныкы – әһәмиятле түгел, безнең бәхет – гаилә һәм балалар», – дип йомгаклады Ирек Галиев.