Юл-транспорт һәлакәтендә авыр җәрәхәтләр алганнан соң 3 ай буена аңсыз яткан Америка кешесе кома вакытында ниләр күрүе турында сөйләгән. Бу турында «People» журналына сылтама белән РИА «Новости» яза.
Басма мәгълүматлары буенча, 2018 елда Джо Димео төнге сменадан соң машинада барганда руль артында йоклап киткән һәм авариягә эләккән, тәненең 80 проценты пешкән. Шуннан соң ул 3 ай комада яткан.
«Комада вакытта этемне ничек йөртүемне тоеп яттым. Ул 2012-2013 елларда үлгән иде. Мин моны ахирәт тормышы дип уйлыйм: мин үз этемне очсыз-кырыйсыз калкулыкта йөрттем», – дип сөйләгән Димео.
Ул комада чагында тирә-юньдәгеләрнең тавышларын ишетүен дәвам итүен, шулай ук бинтларны алыштырганда бик каты авырту тоюын әйтә, болар хәтта аның төшләренә керә.
Һәлакәттән соң 2 ел узгач, Димеога 47 яшьлек ир-атның йөзен һәм кулларын күчереп утыртканнар, диелә хәбәрдә.
