Әнвар Нургалиевка фараз: "Әдилә киленең дә булыр әле, белеп булмый дөнья хәлен"
Башкортстанның атказанган артисты Әнвәр Нургалиев Ноябрьскига гастрольләре белән концерт бирергә барган. Әдилә исемле кыз аңа чәчәк бирергә сәхнәгә чыга һәм озак кына кочагыннан җибәрми. Бу күренеш күпләрнең күңел кылларына үтеп кергән. Концерттан видеоны Әнвәр Нургалиев Инстаграм сәхифәсенә куйган.
"Кичәге концерттан әле дә хушка килә алмыйм, Әдилә һаман да күз алдында. Бу видео эчкерсезлекне күрсәтә, сабыйның чисталыгы, ихласлыгы. Бәхетле бул, балакаем!
Бу мизгел белән уртаклашмыйча булдыра алмадым. Әдилә мине ихлас күңеллелеге белән таң калдырды! Миңа калса, балаларның кочаклавы бер нәрсә белән дә чагыштырырлык түгел, монда бернинди фальш, уйнау юк, аның күзләренә карагыз - нинди эчкерсез караш! Ул минем иңбашыма төшкәч, мин хәтта бераз югалып та калдым. Гомумән, аны кулдан җибәрәсе килмәде, ул да китәргә теләмәде. Безгә, зур кешеләргә, бу балалардан үрнәк алырга кирәк, алар тоя белә һәм һәрвакытта уйлаганнарын әйтә", - дип язган Әнвәр Нургалиев.
"Ә мин яратканга кочаклыйм, ди сабый", "Бу бала хәтта сезгә охшаган, кызыгыз дип уйлап була", "Яхшы кешене балалар кечкенәдән сизә. Сез ягымлы, яхшы кеше", "Сабый кыз. Зато үскәч "бәбәбә, ә мин аны кочактан җибәрми тоткан идем, дип мактаныр", "Бу баланың яратуын күргәч, күзләргә яшь килде", "Әнвәр - хатын-кызларның яраткан артисты. Әдилә моны исбатлады!", "Сез киң күңелле бабай булырсыз оныкларга, Алла бирса", "Әнвәр, Әдилә киленең дә булыр әле, белеп булмый дөнья хәлен", - дип язганнар подписчиклар.