Әнвәр Нургалиевның музыкантлары Гөлназ Асаева төркеменә киткән

“Интертат” хәбәрчесенә Гөлназ Асаева бу вакыйгаларның дөрес булуын әйтте.

- Әнвәр Нургалиевның музыкантлары хәзер минем төркемдә чыгыш ясый. Мин төркемне махсус таркатмадым, егетләр үзләре минем белән гастрольгә йөрергә теләк белдерде. Аннан соң бик күп җырлар авторы Ризван Хәкимовның музыкантлары да минем төркемгә килеп кушылды. Музыкантларга яхшы түлим, әлегә кадәр берсенең дә зарланганы булмады, барысы да кәнәгать. Үзләре дә барлык эшләрне югары дәрәҗәдә башкарырга тырышалар. Төркемдә егетләр генә эшли, кызлар юк. Миңа кызлар белән уртак тел табу авыр бирелә, холкым да кызу.



- Гөлназ, бу хәлләрдән соң Әнвәр Нургалиев белән дустанә мөнәсәбәтләрегез сакланып калдымы? Хәзер аңа яңа төркем тупларга туры киләчәк бит.

- Әнвәр абый Нургалиевка карата хөрмәтем бик зур, аның иҗатын кызыксынып күзәтеп барам. Ул музыкантлар өчен талашып йөри торган кеше түгел. Без аның белән яхшы мөнәсәбәттә, аралашып торабыз. Бу хәлләргә ул артык борчылмады, барысын да тыныч кабул итте. Аның төркемендә эшләргә хыялланган музыкантлар күп, шуңа күрә ул бүген үк яңа төркем туплый алачак.



Әнвәр Нургалиев белән дә аралаштык. Аның әйтүенчә, ул музыкантларын югалтмаган һәм төркем яши.

- Гөлназны сеңлем кебек якын күрәм, аңа карата бернинди дә үпкәм юк. Аннан соң мин музыкантларны югалтмадым, төркем яши. Бары тик төркемнең составын яңартырга булдым, шуңа күрә кайбер музыкантлар китте. Артист һәрвакыт эзләнүдә булырга тиеш, төркемне ишәйтүнең начар ягын күрмим, - диде Әнвәр Нургалиев.