Әнвәр Нургалиев «сабырсызлык заманында кирәкле» җыр тәкъдим итте
Айдар Тимербаев көенә язылган җырны тамашачылар бик яратып кабул иткән.
«Дусларым! Бу елның яңа җыры «Сабырлык догасы», — дип яза Әнвәр үзенең инстаграмдагы сәхифәсенә.
«Ник кешегә белдерергә кайгы баскан мәлләрне,
Ник сөйләргә үзең белән булган кыен хәлләрне?
Шуңа минем чын хисләрем бары Аллаһка таныш,
Сабырлык догасын укып, тик алга таба барыш», — дип җырлый ул.
Инстачылар җырны бик ошаткан. Ялкын сурәте төшерелгән смайликларны бик күп итеп тезгәннәр.
«Әнвәр, сез башкарган җырлар барысы да искитмәле матур бит. Халык сезне беренче җырыгыздан ук күтәреп алды, бик яратты. Киләчәгегез уңышларга уралып барсын. Исәнлек-саулык, имин юллар», — дип мактау яудыралар.
«Бик яхшы. Хәзерге сабырсызлык заманында кирәкле җыр», — дип яза бер инстачы.