Җырчы Нурзадә үзенең туган көнендә яңа җырын тәкъдим итте. Аның сүзләрен Гөлнур Галимова, көен Ирек Габдрахманов иҗат иткән.
«Бик авыр булды бу җырны яздыруы. Ничектер шулай туры килде. Авторлары күптән биргән булсалар да, һич вакыт тимәгән иде. Ниһаять, сәгате сукты, һәр нәрсәнең үз вакыты шул. Нинди генә авырлыклар очраса да, алга барырга Аллаһы Тәгалә көч бирсен», – дип билгеләп үтте Нурзадә «Интертат»ка.
Җырда мондый юллар бар:
«Тормыш мине бик күп сынаса да,
Мин бирешмим әле, көрәшәм.
Якасыннан алып язмышымны,
«Җитте сиңа!» диеп эндәшәм».
Нурзадә җырның видеосын иң якын кешеләре – әти-әнисенең фотоларын куеп ясаган. Җырчының әнисе – моннан күп еллар элек, әтисе шушы арада вафат булды.
