Җырчы Нурзадә кумиры Зәйнәб Фәрхетдинованың концертында булып кайткан. Тамашадан соң туган хис-кичерешләрен ул социаль челтәрдәге сәхифәсендә бүлешкән.
«Яраткан җырчым Зәйнәб Фәрхетдинованвң концертында булдым, ниһаять. Соңгы дүрт-биш программасын карый алмаган идем. Ә бит элегрәк мин аларның (Зәйнәб Фәрхетдинова белән Зөфәр Билаловның – авт.) бер концертын да калдырмый йөри идем. Һәрвакыт диярлек алдагы урыннарга билет ала, җырларын яттан белә идем.
Гомерем буена гашыйк булып яшим Зәйнәб Фәрхетдинованың үзенә, тавышына. Әле мин Искәндәр абый Биктаһиров төркемендә эшли башлагач, Азнакай районы, Сарлы авылына (Зәйнәп ханымның үскән урыны – авт.) кайткач, су буйларын урап килдем, җиргә ятып Зәйнәп апаның аяк эзләрен сыйпадым. Менә шундый хыялый идем мин.
Бу концертта Зөфәр абый да берәр җыр җырлаган булса-а-а... Җитмәде.
Булат, ягъни Акбулат маладис! Әле кечкенә иде бит! Кай арада үсеп беткән һәм хәзер бик талантлы яшь җырчы икән!
Сезгә чын күңелемнән уңышлар телим! Сау-сәламәт булыгыз, яңа үрләргә ирешергә язсын. Сезне яратып һәм хөрмәт итеп, мин – Нурзадә», – дип язган җырчы.
