Нурзадә юлда куып йөргән өчен штраф салганга хурлана
ЮХИДИ хатын алгач, җырчы бик борчылган.
Җырчы Нурзадәгә юлда машина тизлеген арттырган өчен штраф салганнар. Бу турыда ул инстаграмдагы сәхифәсендә язды.
«Хат алдым бит әле мин. Хурландым, хурландым!» — дип яза ул һәм елмаюлы смайликлар куя.
«Кирәк бит, трассада 66 км/сәг тизлек белән куып йөрергә, әстагафирулла. Вәт куып йөрим икән, әй. 166 км/сәг белән барган булсам, бу кадәр хурланмаган булыр идем. Менә шулай күңелле яшәү безнең илдә», — ди җырчы.
Тизлек арттыру 29 сентябрьдә булган, хатны әле китергәннәр. «Штрафны бүлеп түләмәсен диптер инде. Хет ела, хет көл», — дип яза Нурзадә.
Инстачыларның кайсылары кагыйдәләрне сүгә, башкалары ярты бәясен генә түләр өчен онлайн кушымта файдаланырга киңәш итә.